Lokton

An mga lokton yaon sa order nin Orthoptera, sub'order Caelifera. Parati ini halipot sana an antenna asin may makusog na tabay na sa biglang sikad ninda, ini naolaptik nin harayo tolos kun may dinudulagan. Sinda dai naagi nin kumpletong metamorphosis ta an mga ini nahimsa sa sugok na hitsurang antataro na naglolono nin limang beses sagkod na magin sangkap na an hitsura bilang lokton. Sarig sa tamang kundisyon nin panahon an mga ini naluyap nin dakul na maray na inaapod nang alosoos asin dakulang perwisyo sa mga pananom. Nagigin sindang mga dumarapo na kun minsan inuubos an pananom sa mahiwas na karaan. An lokton mga parakakan tinanom, orog an suno ninda an mga dahon kan mga gulayon, mga trigo, paroy asin anopaman na kadootan. Kapamilya kaini an doron na pareho mga damat sa agrikultura. An ibang lokton may ibang kolor o mga kolor na nagpapadulag sa anoman na dumarapo sainda. An lokton apektado man kan mga parasitiko na pati sugok kaini pwedeng uboson. Ini totoo saro man na pagkakan kan ibang tawo sa ibang lugar ta ini sinasanlag o prinipritos. Haloy na an relasyon kan lokton sa tawo poon pa kan soanoy na panahon asin naapektohan kaini an pagbuhay asin historya kan mga tawo mala ta an mga ini tinampok na sa arte asin literatura.